शिरूरला स्वतंत्र वीज वितरण विभागीय कार्यालय मिळणार?
शिरूर, सुदर्शन दरेकर(चावडीराज न्युज पोर्टल )
आंबेगाव-शिरूर परिसरातील झपाट्याने वाढणारे नागरीकरण, औद्योगिक वसाहतींचा विस्तार आणि शेती क्षेत्रातील वाढती वीज गरज लक्षात घेता सध्याच्या वीज वितरण यंत्रणेवर मोठा ताण निर्माण झाला आहे. या पार्श्वभूमीवर केडगाव वीज वितरण विभागाचे विभाजन करून स्वतंत्र “शिरूर वीज वितरण विभागीय कार्यालय” स्थापन करण्यात यावे, अशी महत्त्वपूर्ण मागणी शिरूरचे आमदार ज्ञानेश्वर (माऊली) आबा कटके यांनी राज्याचे मुख्यमंत्री Devendra Fadnavis यांच्याकडे अधिकृत पत्राद्वारे केली आहे.
रांजणगाव येथे मुख्यमंत्री देवेंद्र फडणवीस यांच्या उपस्थितीत ही मागणी मांडण्यात आली. याबाबत प्रसारमाध्यमांशी बोलताना आमदार माऊली आबा कटके यांनी सांगितले की, सध्या शिरूर, आंबेगाव व परिसरातील ग्राहकांना अनेक कामांसाठी दूरवर असलेल्या केडगाव विभागीय कार्यालयावर अवलंबून राहावे लागते. त्यामुळे शेतकरी, उद्योजक तसेच सर्वसामान्य नागरिकांचा वेळ व श्रम मोठ्या प्रमाणात खर्च होतो.
वाढत्या वीज मागणीमुळे यंत्रणेवर ताण
शिरूर शहर आणि परिसरात गेल्या काही वर्षांत औद्योगिक विकासाला वेग आला आहे. तसेच नवीन गृहसंकुले, व्यावसायिक प्रकल्प आणि शेतीसाठी वाढत्या विद्युत वापरामुळे वीजेची मागणी सातत्याने वाढत आहे. परिणामी वीज पुरवठा व्यवस्थेवर अतिरिक्त ताण येत असून ग्राहकांना विविध अडचणींना सामोरे जावे लागत आहे.
स्वतंत्र कार्यालयामुळे मिळणार मोठा दिलासा
स्वतंत्र शिरूर वीज वितरण विभागीय कार्यालय स्थापन झाल्यास नवीन वीज जोडणी, तांत्रिक अडचणी, देखभाल-दुरुस्ती, बिलिंग तसेच ग्राहक सेवा यांसारख्या कामांमध्ये गती येणार आहे. यामुळे नागरिकांना केडगावपर्यंत जाण्याची गरज कमी होऊन स्थानिक पातळीवरच सेवा उपलब्ध होणार आहेत.
शिरूरच्या वीज समस्यांवर प्रभावी उपाय
शिरूर शहरात वाढत्या वीज मागणीमुळे वारंवार निर्माण होणाऱ्या तांत्रिक अडचणी आणि पुरवठा व्यवस्थेतील अडथळ्यांवर मात करण्यासाठी स्वतंत्र विभागीय कार्यालय महत्त्वाची भूमिका बजावू शकते. या मागणीला शासनाची मान्यता मिळाल्यास शिरूर, आंबेगाव आणि परिसरातील हजारो वीज ग्राहकांना त्याचा थेट लाभ होणार असल्याची अपेक्षा व्यक्त केली जात आहे.
“शिरूरच्या वाढत्या विकासाला सक्षम वीज पायाभूत सुविधा आवश्यक आहेत. स्वतंत्र वीज वितरण विभागीय कार्यालयामुळे ग्राहक सेवा अधिक गतिमान होईल आणि वीज पुरवठा अधिक सुरळीत होण्यास मदत मिळेल,” असे आमदार माऊली आबा कटके यांनी सांगितले.
संपादक : सुदर्शन दरेकर
