शिरूर पोलीस स्टेशनचे १५ ऑगस्ट च्या मुहूर्तावर सुसज्ज जागेत स्थलांतर!
१५ ऑगस्टपासून नवीन इमारतीतून कामकाज; नागरिकांच्या सोयीसाठी अत्याधुनिक सुविधांनी सज्ज पोलीस स्टेशन
शिरूर :(प्रतिनिधी )
शिरूर शहरातील नागरिकांसाठी महत्त्वाची बातमी असून, शिरूर पोलीस ठाण्याचे प्रशासकीय व पोलीस कामकाज १५ ऑगस्टपासून नवीन इमारतीतून सुरू होणार आहे. स्वातंत्र्य दिनानिमित्त याच नवीन वास्तूमध्ये ध्वजारोहणाचा कार्यक्रम होणार असून, त्यानंतर पोलीस ठाण्याचा नियमित कारभार नव्या इमारतीतून सुरू राहणार आहे.
बसस्थानकाच्या शेजारी उभारण्यात आलेली ही नवीन इमारत प्रशस्त असून, नागरिकांच्या सोयीचा विचार करून विविध सुविधा उपलब्ध करून देण्यात आल्या आहेत. तक्रारी, अर्ज, गुन्ह्यांची नोंद, विविध पोलीस परवानग्या तसेच इतर पोलीसविषयक कामांसाठी नागरिकांना आता अधिक सुलभ वातावरण मिळणार आहे.
सातत्यपूर्ण पाठपुराव्याला यश
नवीन पोलीस स्टेशनची इमारत पूर्ण झाल्यानंतर प्रत्यक्ष स्थलांतराचा प्रश्न काही काळ प्रलंबित होता. नागरिकांच्या सेवेसाठी नवीन वास्तू लवकर उपलब्ध व्हावी, यासाठी सामाजिक कार्यकर्ते निलेश वाळुंज यांनी संबंधित पातळीवर सातत्याने पाठपुरावा केला. त्यांच्या प्रयत्नांना अखेर यश आले असून, स्वातंत्र्य दिनापासून नवीन वास्तूमधून पोलीस ठाण्याचा कारभार सुरू होत आहे.
तक्रारी, गुन्हे नोंदणी व तपासासाठी सुविधा
नवीन पोलीस ठाण्यात नागरिकांच्या तक्रारी व अर्ज स्वीकारण्यासाठी आवश्यक व्यवस्था करण्यात आली आहे. हरविलेल्या वस्तू किंवा कागदपत्रांबाबतचे अर्ज, विविध पोलीस परवानगीसंबंधी अर्ज तसेच नागरिकांच्या समस्यांवर कायद्यानुसार कार्यवाही केली जाणार आहे.
तक्रारीच्या स्वरूपानुसार आवश्यक असल्यास गुन्ह्यांची नोंद करून तपास केला जाणार आहे. आरोपींचा शोध, पुरावे संकलन, पंचनामे, साक्षीदारांचे जबाब तसेच सीसीटीव्ही आणि तांत्रिक पुराव्यांच्या आधारे तपासाला गती देण्यावर भर राहणार आहे.
महिला, बालक आणि सायबर गुन्ह्यांवर विशेष लक्ष
महिला व बालकांशी संबंधित तक्रारींना प्राधान्याने हाताळण्यासाठी दामिनी पथकाच्या माध्यमातून कार्यवाही केली जाणार आहे. महिला व बालकांच्या सुरक्षिततेबाबत जनजागृती उपक्रमही राबविण्यात येणार आहेत.
तसेच ऑनलाइन आर्थिक फसवणूक, बनावट लिंक, ओटीपी व यूपीआय फसवणूक, केवायसीच्या नावाखाली होणारी फसवणूक आणि सोशल मीडिया संबंधित गुन्ह्यांबाबत नागरिकांना मार्गदर्शन केले जाणार आहे. शाळा, महाविद्यालये, व्यापारी व सामाजिक संस्थांच्या माध्यमातून सायबर जनजागृती करण्यावर विशेष भर दिला जाणार आहे.
कायदा-सुव्यवस्थेला प्राधान्य
शिरूर शहर आणि पोलीस ठाण्याच्या हद्दीत कायदा व सुव्यवस्था अबाधित ठेवण्यासाठी नियमित पेट्रोलिंग, बंदोबस्त तसेच संवेदनशील ठिकाणांवर विशेष लक्ष ठेवण्यात येणार आहे. मिरवणुका, सभा, आंदोलने आणि सार्वजनिक कार्यक्रमांसाठी आवश्यक बंदोबस्ताचे नियोजनही नवीन कार्यालयातून केले जाणार आहे.
शिरूर शहरातील वाहतूक कोंडी, अपघातप्रवण ठिकाणे, नो-पार्किंग क्षेत्र आणि अतिक्रमणामुळे निर्माण होणाऱ्या वाहतूक समस्यांवर संबंधित विभागांच्या समन्वयाने उपाययोजना करण्यावर भर दिला जाणार आहे. महामार्गावरील वाहतूक सुरळीत ठेवण्यासाठीही आवश्यक कार्यवाही केली जाणार आहे.
“नवीन प्रशस्त आणि अत्याधुनिक सुविधांनी युक्त पोलीस स्टेशनमुळे नागरिकांना पोलीस प्रशासनाशी संपर्क साधणे अधिक सोयीचे होईल. नागरिकांच्या तक्रारींचे निराकरण आणि कायदा-सुव्यवस्था राखण्याला प्राधान्य राहील,” अशी माहिती पोलीस निरीक्षक विनोद पाटील यांनी दिली.
शिरूर पोलीस ठाण्याचे नवीन वास्तूमधील स्थलांतर हा शहराच्या दृष्टीने महत्त्वाचा टप्पा मानला जात असून, या सुविधेमुळे नागरिकांना अधिक सुलभ आणि प्रभावी पोलीस सेवा मिळण्याची अपेक्षा व्यक्त होत आहे.
संपादक : सुदर्शन दरेकर
